भरतपुर कोरोना अस्पताललाई लायन्स क्लबको सहयोग, तीन लाख रुपैयाँका सामग्री हस्तान्तरण

चितवन । लायन्स क्लब ईन्टरनेशनल डिष्ट्रिक्ट ३२५ बि टु नेपालले भरतपुरमा हालै सञ्चालनमा आएको भरतपुर कोरोना विशेष (अस्थाई) अस्पताललाई आज अत्यावश्यक सामग्रीहरु उपलव्ध गराएको छ । क्लबका भाईस डिष्ट्रिक्ट गभर्नर रामप्रसाद भट्टले एरिया ३ चितवनका लायन्स क्लबहरुको तर्फबाट भरतपुर महानगरपालिकाका प्रमुख एवम् अस्पतालका संयोजक रेनु दाहाललाई ती सामग्री हस्तान्तरण गर्नु भएको हो ।

क्लबले ५० थान पिपिई (पर्सनल प्रोटेक्टिभ इक्वीपमेन्ट) र ५० लिटर सेनिटाईजर अस्पताललाई हस्तान्तरण गरेको हो । भट्टका अनुसार तीन लाख रुपैयाँ भन्दा बढि मूल्यका सामग्री हस्तान्तरण गरिएको हो । सामग्री हस्तान्तरण गर्दै उहाँले अत्यावश्यक भएकाले तत्काल यी सामग्री उपलव्ध गराएको र आगामी दिनमा आवश्यकता अनुसार थप सहयोग गर्दै जाने प्रतिवद्धता व्यक्त गर्नुभयो । सामग्री ग्रहण गर्दै महानगर प्रमुख दाहालले यो अभियान साझा अभियान भएकाले सबैको साथ र सहयोगको अपेक्षा गर्नुभयो ।

अस्पतालका सदस्य–सचिव डा. भोजराज अधिकारीले अहिलेका अत्यावश्यक सामग्रीहरु प्रदान गरेकोमा लायन्स क्लबलाई धन्यवाद दिँदै यस अभियानमा जुट्न सबैमा आव्हान गर्नुभयो । सामग्री हस्तान्तरण गर्न भट्टसँगै क्लबका चिफ एडभाईजर सिद्धार्थलाल चुके, दिननाथ न्यौपाने, सिनियर एडभाईजर डा. शारदा कँुवर, बागेश्वरी लायन्सका पूर्व अध्यक्ष पूर्णबहादुर श्रेष्ठ र नारायणगढ लायन्सका अध्यक्ष निरज श्रेष्ठ अस्पताल पुग्नु भएको थियो ।

अस्पताललाई यसअघि सिजि फाउण्डेसनले १० थान पीपीई उपलव्ध गराएको थियो ।