कोरोना नियन्त्रणमा प्रभावकारी काम गर्न भरतपुर अस्पतालमा दश उपसमिति गठन

चितवन । भरतपुर अस्पतालमा रहेको आउट ब्रेक म्यानेजमेन्ट कमिटीको आज बसेको बैठकले बिभिन्न १० वटा उपसमिति गठन गरेको छ । अस्पतालका प्रमुख मेडिकल सुपरिटेण्डेन्ट डा. श्रीराम तिवारीको अध्यक्षतामा बसेको बैठकले कोरोना सङ्क्रमण नियन्त्रण तथा रोकथाम सम्बन्धि पूर्वाधार तयार गर्न ती उपसमिति गठन गरेको हो ।

डा. प्रकाश खतिवडाको संयोजकत्वमा पूर्वाधार तयारी उपसमिति, डा. कल्याण सापकोटाको संयोजकत्वमा कर्मचारी व्यवस्थापन समिति, शान्ता भण्डारीको संयोजकत्वमा सूचना सङ्कलन उपसमिति, जमिर अलि सेखको संयोजकत्वमा सुरक्षा तथा शब व्यवस्थापन, रामहरी ढकालको संयोजकत्वमा स्वयम्सेवक परिचालन समिति गठन गरिएको छ ।

त्यस्तै, कृष्णप्रसाद गौतमको संयोजकत्वमा खाद्य व्यवस्थापन, लिलाधर पौडेलको संयोजकत्वमा सूचना तथा सञ्चार, नारायण प्रसाद सापकोटाको संयोजकत्वमा यातायात व्यवस्थापन र ई. चन्द्रमणी बसेलको संयोजकत्वमा आईटी व्यवस्थापन उपसमिति गठन गरिएको अस्पतालका सूचना अधिकारी लिलाधर पौडेलले जानकारी दिनुभएको छ ।