प्रधानमन्त्री ओली अस्पतालबाट ‘डिष्चार्ज’, नियमित सबै कार्य गर्न सक्नुहुन्छ : चिकित्सक

काठमाडौँ । प्रधानमन्त्री केपी शर्मा ओली आफ्नो मिर्गौला प्रत्यारोपण गरेर त्रिवि शिक्षण अस्पतालबाट आज साँझ प्रधानमन्त्री निवास बालुवाटार फर्कनुभएको छ । दोस्रो पटक मिर्गौला प्रत्यारोपण गर्न उहाँ यही फागुन १९ गते अस्पतालमा भर्ना हुनुभएको थियो ।

प्रधानमन्त्रीको पछिल्लो पटक फागुन २१ गते मिर्गौला प्रत्यारोपण गरिएको थियो । मिर्गौला प्रत्यारोपण सफल भएपछि प्रधानमन्त्रीको चिकित्सकको निगरानीमा स्वास्थ्योपचार गरिएको थियो । पूर्णस्वास्थ्यलाभपछि प्रधानमन्त्रीलाई ‘डिस्चार्ज’ गरिएको अस्पतालले जनाएको छ । प्रधानमन्त्रीको स्वास्थ्यावस्था सामान्य रहेको पनि अस्पतालले जनाएको छ ।

त्रिभुवन विश्वविद्यालय, शिक्षण अस्पताल, महाराजगञ्जका मिर्गौला रोग तथा प्रत्यारोपण चिकित्सा विभाग प्रमुख एवम् प्रधानमन्त्रीका निजी चिकित्सक प्रा.डा. दिब्यासिंह शाहले प्रधानमन्त्री ओलीले आवश्यक सतर्कताका साथ आफ्नो नियमित आवश्यक सबै कार्यहरु गर्न सक्नुहुने जानकारी गराउनुभएको छ । यसअघि विसं २०६४ मा भारतको अपोलो अस्पतालमा उहाँको पहिलो पटक मिर्गौला प्रत्यारोपण गरिएको थियो ।