सडक दुर्घटना, सुकुमवासी र नागरिक सुविधाबारे राष्ट्रियसभामा बहस

काठमाडौँ, ३१ वैशाख । राष्ट्रियसभाको आजको बैठकको शून्य समयमा सांसदहरूले सडक दुर्घटना न्यूनीकरण, सुकुमवासी व्यवस्थापन, अपाङ्गता भएका व्यक्तिको अधिकार तथा नागरिक सुविधासम्बन्धी विषयमा सरकारको ध्यानाकर्षण गराउनुभएको छ ।

सांसद कृष्णबहादुर रोकायले यही वैशाखमा रुकुम र अर्घाखाँचीमा भएका सवारी दुर्घटनाप्रति दुःख व्यक्त गर्दै पहाडी क्षेत्रमा सडक सुरक्षा कमजोर हुनु, क्षमताभन्दा बढी यात्रु बोक्ने प्रवृत्ति तथा प्रभावकारी अनुगमनको अभाव मुख्य समस्या रहेको बताउनुभयो । उहाँले यस्ता दुर्घटना न्यूनीकरणका लागि सरकारले समयमै आवश्यक कदम चाल्नुपर्नेमा जोड दिनुभयो ।

सांसद पदमबहादुर परियारले अपाङ्गता भएका व्यक्तिलाई कानुनले व्यवस्था गरेका सेवा, सुविधा र अधिकार प्रभावकारी रूपमा कार्यान्वयन गर्न सरकारसँग माग गर्नुभयो ।

सांसद पूजा चौधरी, विष्णुकुमारी सापकोटा र श्रीकृष्णप्रसाद अधिकारीले भूमिहीन सुकुमवासी तथा अव्यवस्थित बसोबासीको समस्या समाधान गर्दै व्यवस्थित बसोबास र आधारभूत आवश्यकता सुनिश्चित गर्नुपर्ने बताउनुभयो । उहाँहरूले सुकुमवासीको जीवनस्तर सुधारका लागि दीर्घकालीन योजना ल्याउन आग्रह गर्नुभयो ।

यसैगरी, सांसद रेणु चन्दले सिंहदरबार परिसरभित्र पैदल आवतजावत गर्ने सांसद तथा सर्वसाधारणलाई सहज हुने गरी दक्षिण गेट खुला गर्नुपर्ने आवश्यकता औँल्याउनुभयो ।

सांसद सावित्री मल्लले सरकारद्वारा प्रस्तुत नीति तथा कार्यक्रम पुरानै शैलीमा आधारित रहेको टिप्पणी गर्नुभयो । त्यसैगरी सांसद विष्णुबहादुर विश्वकर्मा र रुक्मणी कोइरालाले पनि समसामयिक विषयमा आ–आफ्ना धारणा व्यक्त गर्नुभयो ।