मालपोत चोकमा बुलेट–मोटरसाइकल दुर्घटना, १८ वर्षीया युवतीको मृत्यु

चितवन, ९ मङ्सिर । भारतीय ग्यास बुलेटको ठक्करबाट एक जनाको मृत्यु भएको छ । मृत्यु हुनेमा लमजुङको मध्य नेपाल नगरपालिका वडा नम्बर ३ की १८ बर्षिया राईना श्रेष्ठ रहेकी छन् ।

जिल्ला प्रहरी कार्यालय चितवनका प्रहरी नायव उपरीक्षक रविन्द्र खनालका अनुसार काठमाडौंबाट वीरगञ्ज तर्फ जाँदै गरेको एनएल ०१ एल २४५३ नम्बरको खाली ग्याँस बुलेटले बागमती प्रदेश ०६–००५ प ३०५४ नम्बरको मोटरसाईकललाई ठक्कर दिदाँ मोटरसाईकलमा पछाडी सवार श्रेष्ठको मृत्यु भएको हो । आज बिहान भरतपुर महानगरपालिका वडा नम्बर १० मालपोत चोकमा बुलेटले मोटरसाईकललाई ठक्कर दिएको थियो ।

ठक्करबाट घाईते श्रेष्ठको उपचारका क्रममा कलेज अफ मेडिकल साईन्सेस शिक्षण अस्पतालमा मृत्यु भएको हो । ठक्करबाट मोटरसाईकल चालक मृतकका बुबा ५२ बर्षिय राजकुमार श्रेष्ठ घाईते हुनुभएको छ । उहाँको सोही अस्पतालमा उपचार भईरहेको र अवस्था खतरा मुक्त रहेको उहाँले जानकारी दिनुभयो । मोटरसाईकललाई ठक्कर दिने बुलेट र चालक प्रहरीको नियन्त्रणमा रहेको छ ।