चितवन, १३ कात्तिक । जिल्लामा रगतको अभाव देखिएपछि आकस्मिक रूपमा रक्तदान कार्यक्रम सुरु गरिएको छ । यहाँका अस्पतालहरूमा रगतको अभाव पूरा गर्न नसकिएकाले रक्तदाता र बिरामीका परिवारको भरमा पर्नुपर्ने बाध्यता छ । चाडपर्व र राजनीतिक शून्यताका कारण रगतको समस्या उत्पन्न भएको हो ।
भरतपुर महानगरपालिका वडा नम्बर २ मिल्स एरियामा आयोजित आकस्मिक रक्तदान कार्यक्रममा दुई वडाध्यक्षसहित रक्तदान गरिएको थियो । उहाँहरूसँगै अन्य रक्तदाताहरूले पनि रक्तदान गरेका थिए ।
जिल्लामा रगतको चरम अभाव भएपछि प्रादेशिक रक्तसञ्चार केन्द्र भरतपुरको आग्रहमा नेपाल रेडक्रस सोसाइटी उपशाखा नारायणगढले आयोजना गरेको रक्तदान कार्यक्रममा वडा नम्बर २ का अध्यक्ष मनोज रानाभाट र वडा नम्बर १० का अध्यक्ष परमेश्वर खनालसहित दाताहरूले रक्तदान गरेका हुन् । उपशाखाकी अध्यक्ष कृपा राजभण्डारीले रगतको अभाव भएपछि केन्द्रको आग्रहमा आकस्मिक रक्तदानको आयोजना गरिएको बताउनुभयो । अभियानमा जनप्रतिनिधि, सामाजिक व्यक्तित्वहरूसँगै आम रक्तदाताहरूलाई रक्तदान गर्न आह्वान गरिएको उहाँको भनाइ छ । सो कार्यक्रममा १०५ जनाले रक्तदान गरेका छन् ।
नेपाल रेडक्रस सोसाइटी चितवनका सभापति हरि पौडेलले रगतको अभाव भएपछि रक्तदान गर्न सबैमा आह्वान गरिएको बताउनुभयो । उहाँका अनुसार आज नेपाल रेडक्रस सोसाइटी उपशाखा गीतानगरले पनि रक्तदान कार्यक्रम आयोजना गरेको छ । शुक्रबार लायन्स क्लबहरूले रक्तदानको कार्यक्रम आयोजना गरेका छन् । क्रमशः अभाव घट्दै जाने उहाँको अपेक्षा छ ।
रक्तसञ्चार केन्द्र भरतपुरका प्रमुख रमेशकान्त पौडेलका अनुसार चाडपर्व, राजनीतिक शून्यता, संघसंस्थाका गतिविधिमा कमी, स्कुल–कलेज बिदा, खेतीपाती भित्र्याउने समयका कारण रक्तदान कार्यक्रम कम हुँदा रगतको अभाव भएको हो । दैनिक बिरामीले खोजेका रक्तदाता र स्वस्फूर्त आउनेहरू ५० हाराहारी हुने भए पनि यसले धान्न नसकेको उहाँले बताउनुभयो ।
दैनिक १०० देखि १५० युनिट रगत माग हुने गरेको छ । जसका कारण जिल्लामा रगतको चरम अभाव भएको हो । यहाँका क्यान्सर अस्पतालका बिरामीहरूलाई धेरै रगत आवश्यक पर्छ । त्यसैगरी दुर्घटना, प्रसूति, शल्यक्रिया लगायतमा रगतको अभाव हुने गर्दछ । केन्द्रले चितवनसहित छिमेकी जिल्लाहरूमा पुगेर रगत सङ्कलन गर्ने गरेको छ ।
चितवन, १३ कात्तिक । जिल्लामा रगतको अभाव देखिएपछि आकस्मिक रूपमा रक्तदान कार्यक्रम सुरु गरिएको छ । यहाँका अस्पतालहरूमा रगतको अभाव पूरा गर्न नसकिएकाले रक्तदाता र बिरामीका परिवारको भरमा पर्नुपर्ने बाध्यता छ । चाडपर्व र राजनीतिक शून्यताका कारण रगतको समस्या उत्पन्न भएको हो ।
भरतपुर महानगरपालिका वडा नम्बर २ मिल्स एरियामा आयोजित आकस्मिक रक्तदान कार्यक्रममा दुई वडाध्यक्षसहित रक्तदान गरिएको थियो । उहाँहरूसँगै अन्य रक्तदाताहरूले पनि रक्तदान गरेका थिए ।
जिल्लामा रगतको चरम अभाव भएपछि प्रादेशिक रक्तसञ्चार केन्द्र भरतपुरको आग्रहमा नेपाल रेडक्रस सोसाइटी उपशाखा नारायणगढले आयोजना गरेको रक्तदान कार्यक्रममा वडा नम्बर २ का अध्यक्ष मनोज रानाभाट र वडा नम्बर १० का अध्यक्ष परमेश्वर खनालसहित दाताहरूले रक्तदान गरेका हुन् । उपशाखाकी अध्यक्ष कृपा राजभण्डारीले रगतको अभाव भएपछि केन्द्रको आग्रहमा आकस्मिक रक्तदानको आयोजना गरिएको बताउनुभयो । अभियानमा जनप्रतिनिधि, सामाजिक व्यक्तित्वहरूसँगै आम रक्तदाताहरूलाई रक्तदान गर्न आह्वान गरिएको उहाँको भनाइ छ । सो कार्यक्रममा १०५ जनाले रक्तदान गरेका छन् ।
नेपाल रेडक्रस सोसाइटी चितवनका सभापति हरि पौडेलले रगतको अभाव भएपछि रक्तदान गर्न सबैमा आह्वान गरिएको बताउनुभयो । उहाँका अनुसार आज नेपाल रेडक्रस सोसाइटी उपशाखा गीतानगरले पनि रक्तदान कार्यक्रम आयोजना गरेको छ । शुक्रबार लायन्स क्लबहरूले रक्तदानको कार्यक्रम आयोजना गरेका छन् । क्रमशः अभाव घट्दै जाने उहाँको अपेक्षा छ ।
रक्तसञ्चार केन्द्र भरतपुरका प्रमुख रमेशकान्त पौडेलका अनुसार चाडपर्व, राजनीतिक शून्यता, संघसंस्थाका गतिविधिमा कमी, स्कुल–कलेज बिदा, खेतीपाती भित्र्याउने समयका कारण रक्तदान कार्यक्रम कम हुँदा रगतको अभाव भएको हो । दैनिक बिरामीले खोजेका रक्तदाता र स्वस्फूर्त आउनेहरू ५० हाराहारी हुने भए पनि यसले धान्न नसकेको उहाँले बताउनुभयो ।
दैनिक १०० देखि १५० युनिट रगत माग हुने गरेको छ । जसका कारण जिल्लामा रगतको चरम अभाव भएको हो । यहाँका क्यान्सर अस्पतालका बिरामीहरूलाई धेरै रगत आवश्यक पर्छ । त्यसैगरी दुर्घटना, प्रसूति, शल्यक्रिया लगायतमा रगतको अभाव हुने गर्दछ । केन्द्रले चितवनसहित छिमेकी जिल्लाहरूमा पुगेर रगत सङ्कलन गर्ने गरेको छ ।