सानेपामा आज पौडेल पक्षका जिल्ला सभापतिको छुट्टै भेला, पुग्ला त देउवालाई दबाब ?

काठमाडौँ । गएको शनिबार चितवन पुग्नुभएका नेपाली काँग्रेसका वरिष्ठ नेता रामचन्द्र पौडेलले पार्टी सभापति शेरबहादुर देउवाप्रति चर्को असन्तुष्टी पोख्नुभयो । उहाँले पछिल्लो पटक पार्टी सभापतिले एकलौटी ढङ्गले निर्णय गर्नुभएको र त्यसलाई सच्याए मात्र पार्टी एक हुने बताउनुभएको छ । पत्रकारहरुसँग कुरा गर्दैै पौडेलले ‘सभापतिले एकलौटी रुपमा पुस ११ गते गरेको निर्णय’ सच्याउनुपर्ने बताउनुभयो ।

वरिष्ठ नेता पौडेलले पार्टी सभापतिको कार्यशैलीप्रतिसमेत तीब्र असन्तुष्टी जनाउनुभयो । उहाँले भन्नुभएको थियो– ‘मैले प्रस्तुत गरेका सहमतिका बुँदाहरु टुङ्गो लगाउनुपर्छ, अनिमात्र पार्टी एक हुन्छ ।’

पौडल समूहको बहिष्कारका बीच नेपाली काँग्रेसको केन्द्रीय समिति बैठकले पार्टी पदाधिकारीहरुको म्याद एक वर्ष थप गर्दै १४औँ महाधिवेशनको मिति तोकेपछि पौडेल पक्षले तीब्र असन्तुष्टी जनाउँदै आएको छ । सोही असन्तुष्टीकाबीच पौडेल पक्षले आज सभापति शेरबहादुर देउवालाई दबाब दिन पार्टी केन्द्रीय कार्यालय, सानेपा ललितपुरमै पार्टीका जिल्ला सभापतिहरुको भेला बोलाएको छ ।

अपरान्ह बोलाइएको भेला सहभागी जिल्ला सहभागीहरु आउने क्रम जारी रहेकोले शुरु गर्ने तयारी गरिएको बताइएको छ । पौडेल पक्षले आज गर्न लागेको जिल्ला सभापतिहरुको भेलामा सिटौला पक्षका जिल्ला सभापतिहरुको पनि उपस्थिति रहने पौडेल पक्षको अपेक्षा छ । ७७ मध्ये ५० भन्दा धेरै जिल्लाका सभापतिहरु सहभागी हुने पौडेल पक्षको अपेक्षा छ ।