काठमाडौंबाट शैक्षिक भ्रमणमा गएका विद्यार्थी चढेको बस मुस्ताङमा दुर्घटना

काठमाडौं, १८ बैशाख । काठमाडौंबाट शैक्षिक भ्रमणमा गएको बस मुस्ताङमा दुर्घटनामा हुँदा २१ जना घाइते भएका छन् । काठमाडौं अनामनगरमा रहेको लिबर्टी कलेजबाट शैक्षिक भ्रमणमा गएका विद्यार्थी चढेको दुर्घटनामा परेको हो ।

जिल्ला प्रहरी कार्यालय मुस्ताङले दिएको जानकारी अनुसार प्रदेश ३–०१–००६ ख ६२२ नम्बरको बस मुक्तिनाथबाट जोमसोमतर्फ हिँडेको थियो । वारागुङ मुक्तिक्षेत्र गाउँपालिका–४, कागबेनीमा आज बिहान ९ बजे दुर्घटनामा परेको हो ।

दुर्घटनामा परी १४ जना पुरुष र ७ जना महिला घाइते भएको प्रहरीको भनाइ छ । घाइतेको जिल्ला अस्पताल मुस्ताङमा उपचार भइरहेको छ । सबै घाइतेको अवस्था सामान्य रहेको प्रहरीले जानकारी दिएका छन् । बसमा ३३ जना सवार थिए ।

बस सडकमै पल्टिएको थियो। ब्रेक फेल भएर दुर्घटना भएको हुनसक्ने प्रहरीको प्रारम्भिक अनुमान छ।