सिरहामा दुई समूहबीच झडपमा परी एक जनाको मृत्यु, राजमार्ग अवरुद्ध

काठमाडौँ, ४ पुस । सिरहाको गोलबजारमा दुई समूहबीच झडप हुँदा एक जनाको मृत्यु भएको छ । शनिबार राति उक्त झडप भएको थियो ।

प्रहरीका अनुसार झडपमा परी २६ वर्षीय रामकुमार यादवको मृत्यु भएको छ भने अर्का एक जना घाइते भएका छन् । झडपमा छुरा लागेर यादवको मृत्यु भएको हो । झडपमा परी निकेश सदा गम्भीर घाइते भएका छन् ।

छुरा प्रहारबाट गम्भीर घाइते भएका यादवलाई आरे मेडिसिटी अस्पताल लगिएकामा त्यहीँ उनको मृत्यु भएको हो ।

प्रहरीले घटनामा संलग्नहरू फरार रहेकाले उनीहरूको खोजी भइरहेको जनाएको छ । अहिलेसम्म झडपको कारण भने खुलीनसकेको जनाइएको छ ।

झडपमा परी एक जनाको मृत्यु तथा अर्का एक जना घाइते भएपछि स्थानीयले राजमार्ग अवरुद्ध पारेका छन् । सडकमै टायर बालेर स्थानीयहरूले प्रदर्शन गरिरहेका छन् ।