नयाँ नेतृत्वका लागि अध्यक्ष ओली छलफलमा

सौराहा, १२ मंसिर । नेपाल कम्युनिष्ट पार्टी (एमाले) को जारी १० औं महाधिवेशनमा नयाँ नेतृत्वका लागि अध्यक्ष केपी ओली छलफलमा हुनुहुन्छ । हिजोको बन्द सत्रले नयाँ नेतृत्व प्रस्ताव गर्ने अधिकारी अध्यक्ष ओलीलाई दिएपछि उहाँले छलफल अघि बढाउनु भएको हो ।

एमाले प्रचार विभागका सहसंयोजक सूर्य थापाका अनुसार अध्यक्ष ओलीले विभिन्न तहका छलफलहरु स्अगाडि बढाउनु भएको छ । सबैलाई मिलाएर एकताको सन्देश दिने गरी नेतृत्व प्रस्ताव गर्न अध्यक्ष ओली छलफलमा लाग्नु भएको हो । महिला, दलित, जनजाती, भूगोल लगायतलाई समेटेर नेतृत्व चयन गर्नका लागि उहाँले विभिन्न चरणमा छलफल गरिरहनु भएको छ ।

आज १० बजे हुने बन्द सत्रमा नयाँ नेतृत्वको प्रस्ताव हुने अपेक्षा गरिएको छ । एमालेको केन्द्रीय कमिटी ३०१, पोलिटब्युरो ९९, स्थायी कमिटी ४५ र पदाधिकारी १९ सदस्यीय रहने व्यवस्था छ । विधानमा एक अध्यक्ष, एक वरिष्ठ उपाध्यक्ष, ६ उपाध्यक्ष, एक महासचिव, तीन उपमहासचिव र सात सचिवको व्यवस्था छ । स्थायी कमिटी सदस्य र पोलिटब्युरो भने केन्द्रीय कमिटीबाट चयन हुनेछन् । संशोधित विधानमा केन्द्रीय निर्वाचन, लेखा र अनुशासन आयोग २५–२५ सदस्यीय बनाउने व्यवस्था छ । २५ सदस्यीय आयोगमा एक अध्यक्ष, एक उपाध्यक्ष, एक सचिव र २२ सदस्य रहनेछन् ।