चितवनका प्रत्येक घरमा एमाले महाधिवेशनको निमन्त्रणापत्र

चितवन, ३ मंसिर । नेकपा (एमाले) चितवनले जिल्लाका प्रत्येक घरमा निमन्त्रणापत्र पठाउन शुरु गरेको छ । १० औं महाधिवेशनको उद्घाटन सत्रमा सहभागी हुन आमन्त्रण गर्दै पत्र पठाईएको हो ।

एमाले चितवनका अध्यक्ष पार्वती रावलका अनुसार घरघरमा वितरण गर्नका लागि १ लाख ५० हजार प्रति निमन्त्रणा पत्र जिल्लाका पालिका र वडाहरुमा पठाईसकिएको छ । थप निमन्त्रणापत्र आवश्यक भएमा तत्काल पठाउने गरी तयारी गरिएको रावलले बताउनुभयो ।

दशौं महाधिवेशन प्रचारप्रसार सहयोग समिति चितवनका संयोजक विजय सुवेदीका अनुसार पालिका, वडा र टोल कमिटीहरुले बैठक र भेलाको आयोजना गरी महाधिवेशनको प्रचारप्रसारलाई तीब्रता दिएका छन् । स्तरीय स्तरमा निमन्त्रणा कार्य वितरण, विभिन्न प्रचारात्मक कार्यक्रमहरु भईरहेको उहाँले जानकारी दिनुभयो । सुवेदीले भन्नुभयो “पालिका, वडा र टोल कमिटीहरु सक्रिय रुपमा निमन्त्रणा पत्र वितरण र प्रचार प्रसारमा जुट्नु भएको छ ।”

उद्घाटन कार्यक्रममा एमाले कार्यकर्ता मात्रै नभएर शुभेच्छुक, शुभचिन्तक लगायत आम सर्वसाधारणलाई उपस्थित गराउन सबैलाई निमन्त्रणा गरिएको सुवेदीले बताउनुभयो । उहाँले भन्नुभयो “चितवनबाट मात्रै उद्घाटन सत्रमा एक लाख बढी जनसहभागिता गराउने गरी तयारी गरिएको छ ।”

एमालेको १० औं महाधिवेशन मंसिर १० देखि १२ गतेसम्म चितवनमा हुँदैछ । उद्घाटन कार्यक्रम नारायणगढस्थित नारायणी नदी किनारमा र बन्द सत्र सौराहास्थित होटल सेभेन स्टार परिसरमा हुने तय भएको छ ।