राप्ती नगरपालिकामा तयार भयो पाँच सय जना क्षमताको सिटी हल

चितवन, २२ असोज । राप्ती नगरपालिकाले पाँच सय जना क्षमताको सिटीहल (सभाहल) निर्माण गरेको छ । नगरपालिकाले एक करोड ४ लाख रुपैयाँ खर्च गरेर सभाहल निर्माण गरेको हो ।

राप्ती नगरपालिका वडा नं. २ गड्यौलीमा एक विगाहा १० कठ्ठा जमिनमा सभाहल निर्माण गरिएको नगर प्रमुख प्रभा बरालले बताउनुभयो । राप्तीमा सभाहल नहुँदा त्यहाँ हुने कार्यक्रमका लागि खैरहनी वा सौराहा जानु पर्ने बाध्यता रहेको रहेको बताउँदै बरालले भन्नुभयो “अब राप्ती नगर क्षेत्रमा आफ्नो कार्यक्रम गर्नका लागि अन्यत्र जानुपर्ने बाध्यता हटेको छ ।”

पर्याप्त पार्किङको सुविधा रहेको हुँदा कार्यक्रम गर्न सहज हुने उहाँको भनाई छ । प्रदेश र संघबाट सभाहलका ठूलो बजेट प्राप्त नभएपछि नगरपालिको आन्तरिक श्रोतबाट सभाहल निर्माण गरिएको बरालको भनाई छ । सभाहलको घटस्थापनाका दिन विधिवत रुपमा उद्घाटन गरिएको छ । जनप्रतिनिधि र कर्मचारी प्रवेश गरेर सभाहलको शुभारम्भ गरिएको हो । राप्तीवासीले यो सभाहललाई आफ्नो सम्पत्तिको रुपमा लिएको बरालले बताउनुभयो ।

जिल्लाको सुदूरपूर्वी भागमा रहेको यस नगरपालिका समथर र पहाडी क्षेत्र समेटेर बनेको छ । यो सभाहलबाट चितवनको पूर्वी चितवन सहित मकवानपुरका पश्चिमी क्षेत्रमा रहेका केही गाउँपालिकाहरुले समेत लाभ लिन सक्छन् ।