कामना सेवा विकास बैंकको आयोजनामा खुल्ला रक्तदान

चितवन १९ भदौ । कामना सेवा विकास बैंक नारायणगढ शाखाको आयोजनामा खुल्ला रक्तदान कार्यक्रम सम्पन्न भएको छ । आज बैंकको लायन्स चोक शाखाको परिषरमा बैंकका कर्मचारी र अन्य गरी ६३ जनाले रक्तदान गरेका हुन् ।

संस्थागत सामाजिक उत्तरदायित्व बहन अन्तर्गत रक्तदान कार्यक्रम आयोजना गरिएको बैंकले जानकारी दिएको छ । कार्यक्रममा बोल्दै बैंकका क्षेत्रीय प्रबन्धक सुरेन्द्र भण्डारीले कोरोना जोखिम र निशेधाज्ञाका कारण जिल्लाका अस्पतालहरुमा रगतको अभाव कम गर्न रक्तदान कार्यक्रमको आयोजना गरिएको बताउनुभयो । “जिल्लाका अस्पतालहरुमा रगतको अभाव भएको थाहा पायौं, भण्डारीले भने, यो हाम्रो सामाजिक उत्तरदायित्व पनि हो ।” विगतका दिनमा पनि बैंकले सामाजिक कार्य गर्दै आएको र आगामी दिनहरुमा पनि यस्ता कार्यक्रमलाई निरन्तरता दिदै जाने उहाँको भनाई छ ।

भण्डारीको अध्यक्षतामा सम्पन्न भएको कार्यक्रममा जिल्ला विपद् व्यवस्थापन समितिका संयोजक एवं रेडक्रसका जिल्ला सदस्य महेश्वर थपलिया प्रमुख अतिथिको हुनुहुन्थ्यो । कार्यक्रमको संयोजन विन्दु सिंजाली मगरले गर्नुभएको हो। बैंकको हालसम्म देशभर १२९ वटा शाखा, एक एक्सटेन्सन काउन्टर र ७५ वटा एटिएम रहेका छन् ।