प्रधानमन्त्री ओली नियमित स्वास्थ्य परीक्षणका लागि सिंगापुरमा

काठमाडौँ । प्रधानमन्त्री केपी शर्मा ओली स्वास्थ्य परीक्षणका लागि सिंगापुर जानुभएको छ । प्रधानमन्त्री ओली नियमित स्वास्थ्य परीक्षणका लागि शनिबार साँझ बिमानबाट सिंगापुर जानुभएको हो । प्रधानमन्त्री ओलीको साथमा पत्नी राधिका शाक्य, निजी चिकित्सक प्राडा दिव्यासिंह शाह तथा स्वकीय सचिव राजेश बज्राचार्य र सुरक्षाकर्मी रहेका छन् ।

नियमित परीक्षणको समय ढिला भएको र स्वास्थ्यमा समस्या थपिएपछि परीक्षणका लागि सिंगापुर जानुभएका प्रधानमन्त्री ओली करिव एक साता त्यहाँ रहनुहुने प्रधानमन्त्रीको निजी सचिवालयले जनाएको छ । उहाँको नेसनल युनिभर्सिटी हस्पिटल (एनयूएच) मा स्वास्थ्य परीक्षण हुने प्रधानमन्त्रीको निजी सचिवालयले जनाएको छ । गत शुक्रबार सैनिक अस्पताल छाउनीमा स्वास्थ्य परीक्षण गरेपछि चिकित्सकको सुझावअनुसार उहाँ फलोअपका लागि सिंगापुर जानु भएको हो ।

छाउनीमा प्रम ओलीको नियमित ल्याब परीक्षण गरिएकोमा रगतमा क्रिएटिनिनको मात्रा बढेको पाइएको बताइएको छ । प्रधानमन्त्री ओलीको सन् २००७ मा दिल्लीस्थित अपोलो अस्पतालमा मिर्गौला प्रत्यारोपण गरिएको थियो । ६ वर्षअघि उहाँको हातमा संक्रमण भएको थियो । निकै लामो समय उपचार गरेर उक्त संक्रमण निको भएको थियो ।

प्रधानमन्त्री भएपछि भने कामका धपेडीले उहाँले नियमित परीक्षण गराउन समय मिलाउनु भएको थिएन । उहाँ चिकित्सकको निकै जोडबलपछि नियमित उपचारका लागि सिंगापर जानुभएको हो ।