पत्रकार महासंघ आवद्ध चितवनका पत्रकारको सात लाखको दुर्घटना बीमा

चितवन, १६ असार । नेपाल पत्रकार महासंघ चितवन शाखामा आवद्ध पत्रकारहरुको सात लाख रुपैयाँ बराबरको दुर्घटना बीमा भएको छ । कालिका नगरपालिकाले गत वर्षबाट शुरु गरेको बीमा रकममा प्रिमियम थप गरी सात लाख पु¥याईएको हो ।

कालिका नगरपालिका र युनाईटेड इन्स्योरेन्स कम्पनी (नेपाल) लि.सँगको सहकार्यमा बीमा गरिएको महासंघका अध्यक्ष नारायण अधिकारीले जानकारी दिनुभयो । महासंघका २६७ जना सदस्यको बीमा गरिएको हो ।

गत वर्षदेखि कालिका नगरपालिकाले पत्रकार महासंघ चितवनका सदस्यहरुको बीमा गर्न शुरु गरेको हो । महासंघका निवर्तमान अध्यक्ष राधेश्याम खतिवडा र नगर प्रमुख खुमनारायण श्रेष्ठबीच पत्रकार महासंघ चितवनका सदस्यहरुको बीमा गर्ने सम्झौता भएको थियो । गत वर्ष नगरपालिकाले एक लाख रुपैयाँ प्रिमियम तिरेर तीन लाख रुपैयाँको बीमा गर्न शुरु गरेको थियो भने यस वर्ष प्रिमियम रकममा थप गरी सात लाख पु-याईएको छ ।

कालिका नगरपालिकाका प्रमुख श्रेष्ठले तीन लाख रुपैयाँबाट शुरु गरिएको बीमा यस वर्ष सात लाख पु¥याईएको उल्लेख गर्दै आउँदा दिनमा बीमा कार्यक्रमलाई निरन्तरता दिंदै जाने बताउनुभयो ।

इन्स्योरेन्सका एरिया म्यानेजर प्रयास श्रेष्ठका अनुसार उक्त बीमाबाट दुर्घटना भई घाईते भएमा ७० हजार रुपैयाँ बराबरको औषधि उपचार सेवा र मृत्यु भएमा सात लाख रुपैयाँ पाईने छ । श्रेष्ठले १८ करोड ६९ लाख रुपैयाँ बराबरको जोखिम बहन गर्ने गरी बीमा भएको जानकारी दिनुभयो ।