चितवन आँखा अस्पतालको नयाँ शाखा शुरु

चितवन । भरतपुरको अस्पताल रोडमा सञ्चालित चितवन आँखा अस्पतालले भरतपुर बाईपास रोडमा आफ्नो नयाँ शाखा सञ्चालन गरेको छ । चितवन आँखा अस्पतालले भरतपुर आँखा अस्पतालको नजिकै नयाँ शाखा शुरु गरेको हो ।

अस्पतालका अध्यक्षसमेत रहेका बरिष्ठ नेत्ररोग विशेषज्ञ प्रा.डा. ऋषिकान्त अधिकारीले अत्याधुनिक उपकरण र उच्चस्तरीय प्रविधिसहित शाखा विस्तार गरिएको जानकारी गराउनुभयो । आज आयोजित पत्रकार सम्मेलनमा प्रा.डा. अधिकारीले चितवन आँखा अस्पतालले कम्प्युटर प्रविधिबाट आँखा जाँच, मोतियाबिन्दु तथा जलबिन्दुको शल्यक्रिया, आँखाको प्लाष्टिक तथा कस्मेटिक शल्यक्रिया, मासु पलाएको शल्यक्रिया, आँशु नलीको शल्यक्रिया गर्दै आएको जानकारी गराउनुभयो ।

गत वर्ष चितवन आँखा अस्पतालमा झण्डै १७ हजार विरामीको आँखाको उपचार गरिएको अस्पतालका अध्यक्ष प्रा.डा. अधिकारीले बताउनुभयो । ‘मानिसहरुमा पहिलेको भन्दा आँखा सुरक्षाको सचेतता बढेको छ तर आँखाको समस्या पनि बढ्दै छ’ उहाँले भन्नुभयो– ‘मधुमेह, उच्च रक्तचाप जस्ता रोगले आँखाका विरामी पनि बढेका छन्, वातावरणीय प्रदुषणले पनि आँखाको समस्या बढेको छ ।’

आँखाका नयाँ नयाँ रोगहरु पनि थपिदै गएका तर पहिलेजस्तो आँखा पाक्ने र आँखामा चोट लागेर आउनेको सङ्ख्या अहिले घटेको डा. अधिकारीले बताउनुयभो । ८४ वर्ष नाघेका तथा आर्थिक रुपमा विपन्नलाई निशुल्क सेवा दिइने पनि उहाँले बताउनुभयो ।

चितवन आँखा अस्पतालका सञ्चालक प्रकाश पौडेलले सात वर्ष अघिदेखि सञ्चालन गरिएको यस अस्पतालमा विरामीहरुको चाप र आवश्यकतालाई मध्यनजर गरी आफ्नै भवनबाट अस्पतालको दोस्रो शाखा विस्तार गरिएको जानकारी दिनुभयो । नयाँ शाखाबाट जेठ महिनाभरि निशुल्क आँखा परीक्षण गरिने पनि उहाँले बताउनुभयो । पौडेलका अनुसार दुई करोड रुपैयाँ लगानी भएको चितवन आँखा अस्पतालको नयाँ शाखामा १३ जनाले रोगजारी पाएका छन् ।