सरकारको निर्णय सच्याउन मुद्रण उद्योग संघ चितवनको आग्रह

चितवन । मुद्रण उद्योग संघ चितवनले सरकारले हालै विदेशबाट छपाई गरी आयात गरिने पुस्तकमा भन्सार छुट दिने निर्णय सच्याउन आग्रह गरेको छ । संघले बिहीबार एक विज्ञप्ति प्रकाशित गरी निर्णय सच्याउन आग्रह गरेको हो ।

संघका अध्यक्ष गुमानसिंह खड्काद्वारा हस्ताक्षरित विज्ञप्तिमा नेपालमा निजी लगानीमा स्थापित मुद्रण उद्योगहरुले कच्चा पदार्थहरु आयात गर्दा १५ प्रतिशत भन्सार र १३ प्रतिशत मूल्य अभिबृद्धि कर (भ्याट) व्यहोरिरहेको उल्लेख छ । भन्सार छुटमा आउने तयारी वस्तुसँग भन्सार र भ्याट तिरेर कच्चा पदार्थ आयात गरेका यहाँका उद्योगहरुले प्रतिस्पर्धा गर्न नसक्ने स्पष्ट रहेको विज्ञप्तिमा उल्लेख गरिएको छ ।

विज्ञप्तिमा भनिएको छ “यस्तो व्यवस्थाले मुद्रण उद्योगहरु धरासायी बन्ने निश्चित छ ।” आर्थिक वर्ष २०६७/०७७ को बजेट मार्फत् तयारी सामान आयात गर्दा १० प्रतिशत भन्सार लगाउने निर्णय भएकोमा उद्योगीहरुले केही राहतको महसुस गरिरहेको बेला मन्त्रीपरिषद्को बैठकले मुद्रण उद्योग महासंघसँग समन्वय नगरी अचानक भन्सार खारेज गरी स्वदेशका मुद्रण उद्योगहरुलाई वेवास्ता गरिएको विज्ञप्तिमा जनाईएको छ । यो निर्णय नेपाली मुद्रण क्षेत्रको हितमा नभएकोले स्वदेशी उद्योगहरुको संरक्षण र सम्बद्र्धनमा यो कदम अनुचित भएकोले अविलम्ब सच्याउन विज्ञप्ति मार्फत् जोडदार माग गरिएको छ ।