लक्जरी सुविधासहित चितवन गार्डेन रिसोर्ट सञ्चालनमा आउँदै

चितवन, २५ कात्तिक । चितवन गार्डेन रिसोर्ट सञ्चालनमा आउने भएको छ । हाईटेक लक्जरी सुविधासहित रिसोर्ट सञ्चालनमा आउन लागेको हो । रिसोर्टको व्यवस्थापन केयर हस्पिटालिटी (म्यानेजमेन्ट ग्रुप) काठमाण्डौंले गरेको छ । केयर हस्पिटालिटीका एक्जुकेटिभ डाईरेक्टर सञ्जीव उपाध्यायका अनुसार २८ वटा कोठासहितको रिसोर्टमा २० वटा स्टाण्डर्ड र ८ वटा प्रिमियम कोठा रहेका छन् । तीन वटा ब्याङकुट हल र एउटा कन्फेर्नन्स हल समेत रहेको उक्त रिसोर्टमा एकै पटक ६ सय जना सहभागी भएर कार्यक्रम गर्न सकिने क्षमता रहेको छ ।

स्वीमिङ पुल, बच्चाको लागि बेबी पुल रहेको रिसोर्ट वरपर सुन्दर बगैंचा रहेको छ । अत्याधुनिक सामानको प्रयोग गरी निर्माण गरिएको रिसोर्टमा फाईनडाईन रेष्टुरेन्ट र डिजिटल बार समेत रहेको उपाध्यायले जानकारी दिनुभयो । रिसोर्टको आगामी पुस १० गते क्रिसमस डेको दिन उद्घाटन गर्ने तयारी गरिएको छ । जग्गा बाहेक ३० करोड रुपैयाँभन्दा बढी लगानी गरिएको रिसोर्टमा आन्तरिक सहित बाह्य पर्यटकलाई लक्षित गरिएको छ । नेपालका कर्पाेरेट, साथीभाई र परिवारसहित घुमफिरमा आउनेहरु र नेपालमै लामो समय रहने विदेशी र नेपाल घुम्न आउने विदेशीलाई लक्षित गरी रिसोर्ट सञ्चालन गरिने उपाध्यायले बताउनुभयो । कोरोनाका कारण तत्काल विदेशी पाउने आउने सम्भावना थोरै भएपछि विभिन्न परियोजनामा काम गर्ने विदेशीहरुका लागि रिसोर्ट बस्नका लागि उपयुक्त हुने उहाँको भनाई छ ।

कोरोना कहरका कारण समस्यामा परेको पर्यटन क्षेत्रमा होटल तथा रिसोर्ट भने थपिने क्रममा रहेका छन् । उपाध्यायका अनुसार चितवनकै जगतपुर र भरतपुरमा थप दुई वटा होटल केयरको व्यवस्थापनमा सञ्चालन हुने तयारीमा रहेका छन् । केयर हस्पिटालिटीले नेपालका विभिन्न ठाउँका थ्री, पोर र फाईभ स्टार होटलको व्यवस्थापन गर्दै आएको छ । यसका अतिरिक्त बिजनेश होटल, रिसोर्ट, बुटिक होटल, भिल्ला होटल र अपार्टमेन्ट होटल पनि केयरले व्यवस्थापन गर्दै आएको उपाध्यायले बताउनुभयो ।