कोकाकोला उत्पादन गर्ने बोटलर्स नेपालका मजदुर आन्दोलित, ढुवानी ठप्प पार्ने चेतावनी

भरतपुर । भरतपुरको गोन्द्राङमा रहेको बोटलर्स नेपाल (तराई) लिमिटेडको उद्योगमा कार्यरत ४८ जना मजदुरको रोजगार गुमेको छ । उनीहरु पूर्नवहालीको माग गर्दै आन्दोलित बनेका छन् ।

आफुहरुलाई बिना कारण कामबाट निकालेपछि आन्दोलित भएको मजदुरहरुले बताएका छन । गत पुसबाट निकालिएका उनीहरुले चैत ६ गतेदेखि निरन्तर शान्तिपूर्ण आन्दोलन गर्दै आइरहेका छन् ।

कम्पनीअन्तर्गतको वेयर हाउस विभागमा काम गर्ने उनीहरुको ठकेदार कम्पनी पवन ढुवानीसँग सम्झौता भएको थियो । तर कम्पनीले आफ्नो आवश्यकता अनुसार अन्य विभागमा पनि काम गराउने गरेको संघर्ष समितिका सचिव प्रल्हाद बर्तौलाले बताउनुभयो ।

मजदुरहरुले झण्डै एक दशकअघिदेखि निरन्तर काम गर्दै आइरहेका थिए। आन्दोलनको नेतृत्व गरेका बुद्धिमान सेन्चुरीले पुराना हटाएर नयाँ कामदार राखेकाले आफूहरु आन्दोलित हुनुपरेको बताउनुभयो ।