बिदाको दिन सरकारी गाडी चढेर उपप्रमुख कँडेल बिहेभोजमा गएपछि स्थानीयद्वारा आलोचना

गैंडाकोट । लकडाउनको समय त्यसमाथि शनिबार सरकारी सुविधाको गाडी चढेर विहे भोजमा गएको भन्दा गैंडाकोट नगरपालिकाका उपप्रमुख विष्णुकुमारी कँडेलको आलोचना भएको छ । गैँडाकोट नगरपालिका वडा नं. १७ स्थित होटल रेड हाउसमा उपमेयर सरकारी बा २ झ १३४९ नम्बरको रातो गाडी चढेर जन्तीसहित पुग्नु भएको थियो । सरकारले २५ जनाभन्दा बढी जम्मा भएर कुनै कार्यक्रम नगर्न भनिरहेको समयमा २०० बढी जन्ती सहभागी भएको बिहे भोजमा उपप्रमुख कँडेल सरकारी साधनस्रोतको दुरुपयोग गर्दै पुगेकोमा स्थानीयले आलोचना गरेका हुन् ।

स्थानीयले कोरोनाको कहरको समयमा धेरै जन्ती लिएर उपप्रमुख किन आएको भनेर सोध्दा उहाँले आफूले २५ जना मात्र जन्ती ल्याउन आग्रह गरे पनि धेरै आएको स्वीकार गर्नुभयो । छिमेकीको विवाह भएका कारण आफू सहभागी भएको उहाँले बताउनुभयो ।

सो क्रममा स्थानीयले चर्को विरोध गरे पछि उहाँ विवाह स्थल छाडेर बाहिरिनु भएको थियो। कोरोना कहरको समयमा जनतालाई भडिभाड नगर्न आग्रह गर्नुपर्ने जनप्रतिनिधि नै जन्तीको भिड लिएर जानुलाई स्थानीयले उचित मानेका छैनन् । यसले जनतामा नराम्रो सन्देश गएको स्थानीय बताउँछन् ।