भोटेकोशी विपद् प्रभावित परिवारसम्म हाम्रो यात्रा: मानवीय सेवाको एउटा सानो प्रयास

रामप्रसाद भट्ट

चितवन, २१ भदौ ।  कहिलेकाहीँ प्रकृतिले दिएको चोट यति गहिरो हुन्छ कि त्यसको पीडा शब्दले व्यक्त गर्न सकिँदैन। २०८३ साल भाद्र १० गतेको भोटेकोशी दैवी प्रकोपले नुवाकोटको विदुर नगरपालिका–७ अन्तर्गत टुक्चे क्षेत्रमा पुग्दा धेरै परिवारलाई गहिरो पीडा दिएको थियो। आफ्ना आफन्त, घरबार र जीवनका आधार गुमाएका परिवारहरूको अवस्था देख्दा मन भारी भयो।

यस दुःखद् घडीमा पीडित परिवारको आँसु पुछ्न नसके पनि, उनीहरूको पीडामा केही क्षण साथ दिन सकौँ, दैनिक जीवनमा आवश्यक पर्ने केही सामग्री उपलब्ध गराएर सानो भए पनि मलमपट्टी लगाउन सकौँ भन्ने भावनाका साथ हामी प्रभावित क्षेत्रतर्फ लाग्यौँ।

लायन्स इन्टरनेसनल डिस्ट्रिक्ट ३२५ आर, नेपालका डिस्ट्रिक्ट गभर्नर लायन प्रभाकर पण्डितज्यूको नेतृत्वमा १८ सदस्यीय टोली चितवनबाट गोरखा, आरुघाट हुँदै धादिङको बाटो भएर विपद् प्रभावित क्षेत्रतर्फ अघि बढ्यो।

यात्रा सहज थिएन। तर मनमा एउटा मात्र उद्देश्य थियो— पीडित परिवारसम्म पुग्ने र आफूले सकेको सहयोग गर्ने।

१९ गते शुक्रबार राति प्रभावित क्षेत्रमा प्रवेश गरेपछि स्थानीय कृष्ण बोगटीज्यूको घरमा हामीले साथमा ल्याएका राहत सामग्रीहरूलाई व्यवस्थित रूपमा प्याक गर्‍यौँ। पुरुषहरूका लागि ज्याकेट, ट्र्याकसुट, स्यान्डो, इनर, पेन्टी, टी–सर्ट लगायतका कपडा थिए।

महिला दिदीबहिनीहरूका लागि स्वेटर, हुडी, कुर्ता-सुरूवाल, इनर गार्मेन्ट्स, ब्रा, पेन्टी, साडी, ब्लाउज, पेटिकोट लगायत आवश्यक लत्ताकपडा थिए।

त्यसैगरी घरपरिवारको दैनिक जीवनमा अत्यावश्यक पर्ने प्रेसर कुकर, प्लेट, थाल, चम्चा, जग, बाटा, कराही, फ्राई प्यान, लोटा, चक्कु, डाडु–पन्यु लगायत खाना पकाउने तथा घरायसी सामग्रीहरू पनि हामीले साथमा लगेका थियौँ।

त्यो केवल राहत सामग्री थिएन।

त्यो एउटा सन्देश थियो—
तपाईंहरू एक्लै हुनुहुन्न।
दुःखको यो घडीमा हामी तपाईंहरूसँगै छौँ।

वडा अध्यक्षज्यूको रोहबरमा र स्थानीय समाजसेवीहरूको सक्रिय सहभागितामा वास्तविक रूपमा प्रभावित परिवारहरू पहिचान गरी राहत सामग्री हस्तान्तरण गर्ने कार्य सम्पन्न गर्‍यौँ।

पीडित परिवारका आँखामा देखिएको दुःखले हाम्रो मन छोयो। तर सहयोग प्राप्त गर्दा उहाँहरूको अनुहारमा देखिएको त्यो सानो आशा र मुस्कानले हामीलाई अझ ठूलो प्रेरणा दियो।

यस अभियानलाई सफल बनाउन प्रभावित क्षेत्रको वास्तविक अवस्था हामीसम्म पुर्‍याउनुका साथै आवश्यक समन्वय र सहजीकरण गरिदिनुहुने विदुर नगरपालिकाका समाजसेवी ध्रुव रावल ज्यू प्रति हामी विशेष रूपमा कृतज्ञ छौँ। उहाँहरूको सहयोगकै कारण हामी वास्तविक पीडित परिवारसम्म पुग्न र केही भए पनि मलमपट्टी लगाउन सफल भएका छौँ। उहाँहरूप्रति हार्दिक नमन।

आज हामीले एउटा कुरा फेरि महसुस गर्‍यौँ—

मानवीय सेवामा ठूलो–सानो सहयोग भन्ने हुँदैन।
दुःखमा दिइएको एउटा हात,
एउटा शब्द,
एउटा साथ—
पीडितका लागि जीवनकै ठूलो भरोसा बन्न सक्छ।

लायन्सको मूल भावना नै हो—
We Serve.

त्यसैले विपद्को यो घडीमा पनि हाम्रो यात्रा केवल राहत वितरणको यात्रा थिएन।

यो थियो—
मानवताको यात्रा।
समवेदनाको यात्रा।
सहयोग र सेवाको यात्रा।

भोटेकोशी विपद्का कारण आफ्ना प्रियजन गुमाउनुहुने सम्पूर्ण परिवारप्रति हार्दिक समवेदना व्यक्त गर्दछौँ।

विस्थापित तथा प्रभावित सम्पूर्ण दाजुभाइ तथा दिदीबहिनीहरूलाई हामी भन्न चाहन्छौँ—

तपाईंहरूको दुःख हाम्रो पनि दुःख हो।
तपाईंहरूको पीडामा हामी पनि सहभागी छौँ।
र, मानवताको सेवामा हामी सकेसम्म तपाईंहरूको साथमा रहनेछौँ।

सेवा नै धर्म हो।
मानवता नै हाम्रो पहिचान हो।
We Serve. …..

(भरतपुर महानगरपालिका वडा नम्बर २ निवासी रामप्रसाद भट्ट लायन्स क्लब इन्टरनेसनल डिस्ट्रिक्ट ३२५ बी टुका पूर्व गभर्नर हुनुहुन्छ ।)