७४ औं मदन जयन्तीमा चितवनको दासढुंगामा वृक्षारोपण गरिने

चितवन, १३ असार । नेकपा (एमाले) का तत्कालिन महासचिव जननेता मदन भण्डारीको ७४ औं जन्मजयन्ती देशव्यापी रुपमा विभिन्न कार्यक्रम गरी मनाईदै छ । मदन भण्डारी फाउण्डेशन चितवनले भरतपुर महानगरपालिका वडा नं. २९ स्थित दासढुंगामा वृक्षारोपण गर्ने भएको हो ।

मदन भण्डारी फाउण्डेशन चितवनका अध्यक्ष डा. तिलचन्द्र भट्टराईका अनुसार दासढुंगाको माथिल्लो भागमा रहेको जग्गामा विभिन्न फलफूलका विरुवा रोप्ने कार्यक्रम रहेको छ । ७४ औं मदन जयन्तीको अवसरमा फलफूलका विरुवा रोप्ने कार्यक्रम तय गरिएको उहाँले बताउनुभयो । असार १४ गते बिहान ८ बजेदेखि कार्यक्रम हुने उहाँले जानकारी दिनुभयो । फाउण्डेशनले यस अघि लगातार दुई वर्ष कालिकामा र अर्काे दुई वर्ष माडीमा मदन जयन्तीको अवसर पारेर फलफूलका विरुवा रोपेको उहाँको भनाई छ ।

वि सं २०४९ माघ १४–२० मा सम्पन्न एमालेको पाँचौँ राष्ट्रिय महाधिवेशनमा जननेता भण्डारीबाट प्रस्तुत र पारित ‘नेपाली क्रान्तिको कार्यक्रम जनताको बहुदलीय जनवाद’ अहिले पनि एमालेको मार्गदर्शक सिद्धान्तका रूपमा रहेको छ।

वि सं २००९ असार १४ गते ताप्लेजुङको ढुंगेसाँघुमा जन्मिनु भएका भण्डारीको वि सं २०५० जेठ ३ गते चितवनको दासढुंगामा रहस्यमय जीप दुर्घटनामा परी निधन भएको थियो। जनताको बहुदलीय जनवाद सिद्धान्तका प्रवर्तक भण्डारी नेपालको राजनीतिक वृत्तमा मार्क्सवादको नवीन प्रयोगकर्ता तथा विचारकका रुपमा रहनु भएको छ ।