दाङबाट काठमाडौं आउँदै गरेको बस रुपन्देहीमा दुर्घटना

काठमाण्डौं, ३० जेठ । दाङको तुलसीपुरबाट काठमाडौं आउँदै गरेको बस रुपन्देहीमा दुर्घटना भएको छ । मंगलबार अपरान्ह ५ बजेतिर छुटेको रा १ ख २७८३ नम्बरको बस रुपन्देहीको सैनामैना स्थित सालझुण्डीमा राति ११ः५० बजे दुर्घटनामा परेको हो ।

जिल्ला प्रहरी कार्यालय रूपन्देहीका सूचना अधिकारी डिएसपी मनोहर प्रसाद भट्टका अनुसार बिग्रिएर रोकेको ट्रकमा ठोक्किएर बस दुर्घटना भएको थियो ।

बालुवा बोकेको लु१ख ६८७ नम्बरको ट्रक सैनामैना नगरपालिका–१० स्थित सालझुण्डी बजारको पुलमा बिग्रिएर बसेको थियो।

दुर्घटनामा परी चालकसहित ४३ जना घाइते भएका छन् ।

घाइतेको स्थानीय अस्पताल र बुटवलका विभिन्न अस्पतालमा उपचार गरिएको थियो । अहिले बिहान सम्म १९ जना उपचारपछि डिस्चार्ज भइसकेको प्रहरीले जानकारी दिएका छन् ।