देशका यी भू-भागमा वर्षा र हिमपात, कस्तो रहला आजको मौसम?

काठमाडौँ, १९ माघ । देशको पश्चिमी क्षेत्रमा वर्षा र हिमपात भएको छ । प्रायगरी सुदूरपश्चिम, कर्णाली तथा गण्डकी प्रदेशका जिल्लाहरुमा वर्षा र हिमपात भएको जल तथा मौसम विज्ञान विभाग मौसम पूर्वानुमान महाशाखाले जानकारी दिएको छ ।

बिहीबार साँझ काठमाडौं उपत्यकामा पनि हल्का वर्षा भएको छ । काठमाडौं आसपासका उच्च पहाडमा हल्का हिमपात समेत भएको छ ।

हाल नेपालमा पश्चिमी वायुको आंशिक प्रभाव रहेको पूर्वानुमान महाशाखाले जनाएको छ ।

अहिले बिहान देशका पहाडी भू-भागमा आंशिक बदली रही बाँकी भू-भागको मौसम मूख्यतया सफा रहेको छ। तराईका थोरै स्थानमा हुस्सु कुहिरो लागेको छ।

महाशाखाका अनुसार आज दिउँसो कोशी प्रदेश लगायत देशका पहाडी भू-भागमा आंशिकदेखि साधारण बदली रही बाँकी भू-भागमा मौसम सफा रहनेछ । कोशी र गण्डकी प्रदेशका पहाडी भू-भागका एक-दुई स्थानमा हल्का वर्षाको सम्भावना छ।

कोशी प्रदेशको उच्च पहाडी तथा हिमाली भू(भागका थोरै स्थानमा तथा बाँकी उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना छ।

आज राति कोशी, बागमती, गण्डकी र कर्णाली प्रदेशका पहाडी भू-भागमा आंशिक बदली रही बाँकी भू-भागमा मौसम सफा रहनेछ। कोशी प्रदेशको पहाडी भू-भागका एक-दुई स्थानमा फाटफुट देखि हल्का वर्षाको सम्भावना रहनेछ ।

कोशी, गण्डकी र कर्णाली प्रदेशको उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना रहेको मौसम पूर्वानुमान महाशाखाले जनाएको छ ।