रोजगारीको सिलसिलामा विभिन्न देश गएका ७ सय भन्दा बढी नेपाली विदेशी जेलमा

काठमाडौं, ४ पुस ।  मुलुकभित्र रोजगारीको अवसरको अभावमा प्रतिवर्ष लाखौंको संख्यामा नेपाली युवाहरू वैदेशिक रोजगारीमा जान बाध्य भएका छन्। तर हाल रोजगारीको सिलसिलामा विभिन्न देश गएका ७ सय भन्दा बढी नेपाली भने विदेशी जेलमै रहेका छन् । श्रम, रोजगार तथा सामाजिक सुरक्षा मन्त्रालयले सार्वजनिक गरेको नेपाल श्रम आप्रवासन प्रतिवेदन २०२२ का अनुसार ६९६ पुरुष र ३९ जना महिला गरेर ७३५ नेपाली विभिन्न जेलमा रहेका हुन् ।

सन् २०२१–०२२ मा सबैभन्दा बढी ३४७ जना पुरुष र २४ जना महिला गरी ३७१ जना युनाइटेड अरब इमिरेट्स (यूएई)को जेलमा रहेका मन्त्रालयको तथ्यांकमा उल्लेख छ । त्यस्तै साउदी अरेबियामा १२७ जना पुरुष र १ जना महिला गरेर १२८ जना, मलेसियामा ९६ जना पुरुष र २ जना महिला गरी ९८ जना रहेका छन् ।