बागीलाई फकाउने प्याकेज होइन, हृदय र मन लिएर आएको छु : गृहमन्त्री खाँड

चितवन, १४ वैशाख । गृहमन्त्री बालकृष्ण खाँडले आगामी वैशाख ३० गते हुने निर्वाचनमा बागी उम्मेदवार दिएकाहरुलाई प्याकेज नभएर हृदय र मन लिएर आएको बताउनु भएको छ । प्रेस युनियन चितवनले भरतपुर विमानस्थलमा आज आयोजना गरेको पत्रकार सम्मेलनमा बोल्दै उहाँले कांग्रेसका सबै नेता कार्यकर्ताहरुलाई सम्मान गर्न सकियोस् भनेर मन लिएर आएको बताउनु भएको हो ।

भरतपुरमा गठबन्धन विरुद्ध उम्मेदवारी परेपछि आउनु भएका खाँडले स्वतन्त्र रुपमा उम्मेदवारी दिनु भएका साथीहरुको पार्टीमा गरेको योगदानलाई स्मरण गरेर अझै आवश्यकता रहेको बताउनुभयो । बागी उम्मेदवारलाई उहाँले भन्नुभयो “पार्टीको निर्णयलाई सहजतापूर्वक लिनुहोस् र आफ्नो निर्णैय फिर्ता लिनुहोस् ।” उहाँलनेपाली कांग्रेसका नेता कार्यकर्ताहरुले दिनु भएको उम्मेदवारी फिर्ता लिनु हुनेछ भन्ने आफूलाई विश्वास लागेको बताउनुभयो ।

गठबन्धनबाट कांग्रेसको भोट नगुम्ने उहाँको दावी छ । अहिलेको राष्ट्रिय राजनीति गठबन्धनको जगमा उभिएको भन्दै उहाँले भन्नुभयो “जुन गठबन्धन भएको छ त्यसलाई सहज रुपमा लिनुपर्दछ । नेपाली कांग्रेसको १४ औं महाधिवेशनले पनि गठबन्धनलाई अनुमोदन गरेको छ ।” महाधिवेशनमा अध्यक्ष देउवाले यो गठबन्धन सत्ताको साझेदारी मात्रै होइन, लोकतन्त्र र संविधाने को रक्षाको लागि आवश्यक रहेको बताउनु भएको खाँडले स्मरण गराउनु भयो । उहाँले भन्नुभयो “नेपाली कांग्रेसको दस्तावेजमा गठबन्धनको कुरा उल्लेख छ ।”

चितवन जिल्लाका समस्त कांग्रेसका नेता कार्यकर्ताहरुलाई सम्मान गर्ने बताउँदै उहाँले अगाडि थप्नुभयो “यो गठबन्धन गर्दा हामीले चाहेको मात्रै हुँदैन । गठबन्धनमा आवद्ध राजनीतिक शक्ति छ, त्योसँग पनि संवाद छलफल हुन्छ । कहिलेकार्ही एक कदम पछाडि पनि हट्नुपर्छ । यो कार्यान्वयन गर्ने जिम्मेवारी हामी सबैको हो ।”