देश बचाउन राप्रपाले जनतासँग गुहार मागेको छ : उपाध्यक्ष पाण्डे

भरतपुर, २ वैशाख । राप्रपाका केन्द्रीय उपाध्यक्ष विक्रम पाण्डेले देश बचाउन राप्रपाले जनतासँग गुहार मागेको बताउनुभएको छ । भरतपुरमा आज आयोजित आमसभालाई सम्बोधन गर्दै उहाँले विभिन्न बहानामा देशको मुटु कलेजो हस्तान्तरण गर्ने चलखेल भएकाले जनताले खबरदारी गर्नुपर्ने बताउनुभएको छ ।

उहाँले फलानो पार्टी भन्दा पनि देश बचाउन लाग्नुपर्ने बताउँदै भन्नुभयो “यो साल राष्ट्रवादीहरुको जित होस्, रोजगारी सृजना गर्दै स्वदेश फर्किने वातावरण बनोस्उ ।” एमसीसी चक्रव्युहले देशलाई अँध्यारो बनाउने षड्यन्त्र भैरहेको उहाँको भनाई छ । भ्रष्टाचार रहित देश बनाउन जनताले राप्रपालाई रोज्ने उहाँको दावी छ । पञ्चायतकालको ३० वर्षमा खुलेका उद्योग, कलकारखानाहरु कौडिको मूल्यमा बेचेर भ्रष्टाचार भएको पाण्डेले बताउनुभयो ।

“अब देशमै प्रयाप्त विद्युत उत्पादन गर्न नेपालीहरुलेनै हाइड्रोपावरमा लगानी गरौं” उहाँले भन्नुभयो, “विश्वकै हाइटेक उद्योगहरु नेपालमा स्थापना हुनेछन्, रोजगारी सृजना हुनेछन् ।” उहाँले राप्रपाप्रति जनताको विश्वास बढेको बताउनुभयो ।