सीडीओ शर्मा घरमै पुगेर असहाय-अशक्तलाई नागरिकता प्रदान

भक्तपुर,२४ चैत्र । प्रमुख जिल्ला अधिकारीको नेतृत्वमा असाह्य, अशक्तलाई बुधबार घरदैलो सेवा अन्तर्गत नागरिकता प्रदान गरिएको छ ।

भक्तपुरका प्रमुख जिल्ला अधिकारी (सीडीओ) रुद्रादेवी शर्माले सूर्यविनायक नगरपालिका (सूनपा) वडा नं.४ दधिकोट स्थित चर्खण्डीका ९१ वर्षिय वृद्धा सूर्यबहादुर खड्का र सूनपा पडा नं. १ सिरुटारकी १७ वर्षिया अशक्त युवती अनुपमा मिश्रलाई टोलीले घरमै पुगेर शर्माको टोली नागरिकता प्रदान गरिएको हो ।

९१ वर्षीय खड्का विगत पाँच वर्षदेखि आँखाको ज्योती गुमेको साथै शरीरको कम्मरमुनीको भाग नचल्ने र नियमितरुपमा अक्सिजन लिईरहनु पर्ने अवस्थाको अशक्त थिए । खड्काको नागरिकता हराएकोले प्रतिलिपी माग गरेको खड्काका छोरा श्रीकृष्ण खड्काले बताए । श्रीकृष्णले पिता सूर्य बहादुरको नागरिकताको प्रतिलिपि माग गरेपछि प्रशासनले आवश्यक छानविन गरी, सत्य तथ्य पत्ता लगाएर घरमै पुगेर सेवा दिने निर्णय गरेको प्रजिअ शर्माले बताए ।

त्यस्तै अर्का सिरुटारकी १७ वर्षिया मिश्र जन्मजात अपाङ्गता भएकी युवती हुन । उनी बोल्न नसक्ने, श्रवणशक्ति नभएका र कम्मर मुनीको भाग नचल्ने समस्याबाट पिडित छिन् । असक्त अनुमपाकी पिता उद्धव प्रसाद मिश्रले छोरीको नागरिकता माग गरेपछि नागरिकता प्रदान गर्न प्रजिअ शर्मा मिश्र निवास पुगेर नागरिकता प्रदान गरेको हो ।

असाह्य, अशक्त र वृद्धवृद्धाहरुलाई आवश्यकता अनुसार घरदैलोमा नै सेवा दिने नीति अनुसार खड्का र मिश्रलाई घरमै गएर नागरिकता प्रदान गरिएको हो प्रजिअ शर्माले बताए । आवश्यक परे सरकार घरदैलोमा पुगेर सेवा दिन्छ भन्ने सन्देश दिन पनि नागरिकता, अपांगता परिचयपत्र सेवाग्राहीको घरमै पुगेर प्रदान गर्ने नीति सरकारको छ, शर्माले बताए ।

खड्का र मिश्रलाई नागरिकता प्रदान गर्न प्रजिअ शर्माको नेतृत्वमा सहायक प्रमुख जिल्ला अधिकारी माधव प्रसाद शर्मा, भक्तपुर प्रहरी प्रमुख शिवकुमार श्रेष्ठ, जिल्ला प्रशासन कार्यालय प्रशासकिय अधिकृतहरु, नागरिकता फाँटका कर्मचारीहरु सहभागी थिए ।