व्यवसायीले बन्द गरे पेट्रोलियम पदार्थको ढुवानी, पेट्रोल–डिजेल–ग्याँसको अभाव हुन सक्ने

काठमाण्डौं, १८ चैत । नेपाल आयल निगमसँग विभिन्न माग राख्दै आन्दोलित व्यवसायीहरुले देशभर आजबाट पेट्रोलियम पदार्थको ढुवानी ठप्प बनाएका छन् । यससँगै बजारमा पेट्रोल, डिजेल, मट्टीतेल र ग्याँसको अभाव हुन सक्ने देखिएको हो ।

आयल निगमले इन्धन खरिद गर्ने भारतीय डिपो र नेपालस्थित निगमको डिपोबाट डिलरले खरिद गर्ने सबै प्रकारका पेट्रोलियम पदार्थको ढुवानी रोकिएको नेपाल पेट्रोलियम ढुवानी व्यवसायी महासंघका महासचिव विश्व अर्यालले बताउनुभयो । “निगमको डिपो र डिपोबाट बिक्रेताको लागि हुने लोड÷अनलोड रोकेका छौं” अर्यालले भन्नुभयो “हाम्रो माग सम्बोधन गर्न निगम तयार भएन ।”

आन्दोलनका कारण ढुवानीमा संलग्न १ हजार ४ सय ट्यांकर र करिब १ हजार बुलेटबाट पेट्रोल, डिजेल, मट्टितेल, हवाई इन्धन र खाना पकाउने ग्याँसको दैनिक आपुर्ति प्रभावित हुने छ । व्यावसायीको अवरोध कायमै रहे देशभर पेट्रोलियम पदार्थको अभाव हुनसक्नेछ ।