सत्ता गठबन्धनबीच महानगरपालिका र उपमहानगरपालिकामा तालमेलको तयारी, भरतपुर कसको भागमा ?

काठमाण्डौं, २ चैत । सत्ता गठबन्धनमा आबद्ध दलहरू आगामी वैशाख ३० गते हुने स्थानीय तहको निर्वाचनमा महानगरपालिका र उपमहानगरपालिकामा तालमेल गरेर अघि बढ्ने गृहकार्य शुरू भएको छ । चुनावमा गठबन्धन बनाएर प्रतिस्पर्धामा उत्रने कि एक्लाएक्लै प्रतिस्पर्धा गर्ने भन्ने सम्बन्धमा साझा धारणा बनाउन नसकेका सत्ता गठबन्धनले महानगरपालिका र उपमहानगरपालिकामा भने तालमेल गरेर प्रतिस्पर्धा गर्ने गृहकार्य अघि बढाएको हो ।

स्थानीय तहको निर्वाचनमा सरकारको नेतृत्व गरिरहेको नेपाली कांग्रेसले कम्युनिस्ट पार्टीहरू विभाजित भएकाले एक्लै चुनाव जित्न सकिने दाबी गरिरहँदा सत्ता गठबन्धनमा आबद्ध माओवादी केन्द्र, एकीकृत समाजवादी केन्द्र र जनता समाजवादी भने तालमेल गरेर जानुपर्नेमा जोड दिइरहेका छन् ।

गठबन्धनको शीर्ष तहमा महानगरपालिका र उपमहानगरपालिकामा चुनावी तालमेल गरेर जाने र नगरपालिका र गाउँपालिकामा भने त्यहाँको वस्तु अवस्था हेरेर निर्णय गर्न दिने विषयमा छलफल भइरहेको बताइएको छ ।

छलफलमा कुन महानगर र उपमहानगर कुन पार्टीको उम्मेदवार बनाउने भन्ने विषयमा अझै निर्णय हुन सकेको छैन । कांग्रेसको मुख्य जोड काठमाण्डौं महानगरपालिका रहेका रहेका छ भने माओवादीले भरतपुर महानगरपालिका ताकेको छ । जनता समाजवादी र एकीकृत समाजवादीले पोखरा महानगरपालिकामा चासो राखेका छन् । ठोस निर्णयमा नपुगेसम्म कुन महानगर र उपमहानगर कसले पाउने भन्ने निश्चित हुने छैन ।