नेपाल उद्योग संघको राष्ट्रिय अधिवेशन चितवनमा, एमाले महासचिव शंकर पोखरेलले उद्घाटन गर्ने

चितवन, १ चैत । नेपाल राष्ट्रिय उद्योग व्यवसायी महासंघ अन्तर्गतको नेपाल उद्योग संघको राष्ट्रिय अधिवेशन चितवनमा हुने भएको छ । यही चैत ५ गते चितवनको सौराहा स्थित होटल जंगल क्राउनमा अधिवेशन हुन लागेको हो ।

समितिका संयोजक डा. तिलचन्द्र भट्टराईका अनुसार अधिवेशनको नेकपा (एमाले) का महासचिव शंकर पोखरेलले उद्घाटन गर्नुहुने छ । कार्यक्रममा नेकपा (एमाले) का स्थायी कमिटी सदस्य तथा जनसंगठन समन्वय संयन्त्रका संयोजक भानुभक्त ढकाल र सहसंयोजक रचना खड्काले पनि सम्बोधन गर्ने कार्यक्रम रहेको छ ।

अधिवेशनमा देशभरबाट एक सयभन्दा बढी प्रतिनिधिको सहभागिता हुनेछ भने आयोजक जिल्ला चितवनबाट १५० जना सहभागि हुनेछन् । अधिवेशनले नयाँ नेतृत्व चयन गर्नुका साथै उद्योगी व्यवसायीहरुका समस्याबारे गहन छलफल गर्ने छ ।

संयोजक भट्टराईले भन्नुभयो “यो अधिवेशन प्रशिक्षण सहितको अधिवेशन हुनेछ ।” नेपालमा ठूलो आर्थिक समस्या आउँदै गरेको भन्दै उहाँले अगाडि थप्नुभयो “बैंकमा तरलता अभाव छ, राज्यसँग डलर संचित न्यून छ ।” यसले नेपालको अर्थतन्त्रमा ठूलो समस्या आउन सक्ने भन्दै उहाँले यस बारेमा अधिवेशनमा व्यापक छलफल हुने जानकारी दिनुभयो । उद्योग व्यवसायको वर्तमान अवस्था र आगामी रणनीतिबारेमा छलफल हुने भट्टराईको भनाई छ ।

यसैबीच अधिवेशनलाई भव्य र सभ्य रुपमा सम्पन्न गर्ने बारे यहाँ छलफल भएको छ । छलफलमा संयोजक भट्टराई सहित जिल्लाका उद्योगी व्यवसायीहरु हरिप्रसाद सुवेदी, चिरञ्जीवि सुवेदी, शंकर नेपाल, राजेन्द्र ओली, खोमकान्त रेग्मी, प्रकाश आचार्य, उमेशचन्द्र सापकोटा, दुर्गाप्रसाद गौतम, सनद लामिछाने, शम्भु सुवेदीलगायतको सहभागिता रहेको थियो । छलफलले अधिवेशन सम्पन्न गर्न जिम्मेवारी बाँडफाँड गरेको छ ।