प्रेस युनियनको महाधिवेशन जेठ १३ र १४ गते हेटौंडामा

काठमाण्डौं, ३० फागुन । नेपाल प्रेस युनियनको महाधिवेशन आगामी जेठ १३ र १४ गते हेटौंडामा हुने भएको छ । युनियनको आठौं महाधिवेशन भएको आठ वर्षपछि नवौं महाधिवेशन हुन लागेको हो।

आइतबार बसेको युनियनको बैठकले नवौं महाधिवेशन ०७९ जेठ १३ र १४ गते गर्ने निर्णय गरेको बरिष्ठ उपाध्यक्ष दीपक आचार्यले जानकारी दिनुभयो । महाधिवेशन बागमती प्रदेशको राजधानी हेटौंडामा हुने उहाँको भनाई छ ।

स्थापना दिवस पारेर नवौं महाधिवेशन गर्न लागिएको छ। प्रेस युनियन नेपाली कांग्रेसको शुभेच्छुक संस्था हो।

२०७१ भदौमा युनियनको पोखरामा आठौं महाधिवेशन भएको थियो भने उक्त महाधिवेशनबाट अध्यक्षमा बद्री सिग्देल निर्वाचित हुनु भएको थियो । महाधिवेशन मिति तय गरेर पनि पटकपटक सारेको र महाधिवेशन गर्न नसकेको भन्दै युनियन नेतृत्वको आलोचना हुँदै आएको छ ।