९ अर्ब ५० करोड विकास ऋणपत्र जारी गर्दै राष्ट्र बैंक

काठमाडौँ,२४ माघ। नेपाल राष्ट्र बैंकले साढे ९ अर्ब रुपैयाँ बराबरको विकास ऋणपत्र जारी गर्ने भएको छ । बैंकले आगामी बुधबारदेखि दुई वर्षका लागि ‘विकास ऋणपत्र २०८० ‘च’ जारी गर्ने भएको हो । सोमबार एक सूचना जारी गर्दै बैंकले बैंक तथा वित्तीय संस्था, गैर–बैंक वित्तीय संस्था, बीमा कम्पनी, संगठित संस्था तथा नेपाली नागरिकलाई उक्त विकासपत्र खरिदका लागि आह्वान गरेको छ ।

इच्छुक खरीदकर्ताले मंगलबार दिउँसो ३ बजेसम्म विकासपत्र खरिदका लागि दरखास्त दिन सक्नेछन् । अनलाइन बोल कबोलमार्फत जारी गरिने यस विकास ऋणपत्र राष्ट्र बैंकको वेबसाइटबाटै आवेदन दिन सकिनेछ ।

बैंकका अनुसार प्रतिस्पर्धाका आधारमा बिक्री गरिने भएपनि यस विकास ऋणपत्रलाई प्रतिस्पर्धी र अप्रतिस्पर्धी गरी दुई भागमा विभाजन गरिएको छ । जसमा कुल विकास ऋणपत्रको अधिकतम ८५ प्रतिशत प्रतिस्पर्धी बोलवालाहरुलाई र १५ प्रतिशत विकास पत्र अप्रतिस्पर्धी बोलवालाहरुलाई छुट्याइएको छ ।