सेयर बजारमा हरियाली, साडे ९ अर्ब नाघ्यो कारोबार रकम

काठमाडौं,२ माघ । यस महिनाको पहिलो कारोबार दिन आज (आइतबार) सेयर बजारमा रौनकता छाएको छ । नेप्से परिसूचकमा वृद्धि हुँदा कारोबार रकम पनि ह्वात्तै बढेको छ ।

नेपाल स्टक एक्सचेञ्जका अनुसार आज सेयर कारोबार मापक नेप्से परिसूचक ६९ अंकले बढेर २९२६.७४ विन्दुमा पुगेको छ । नेप्से २.४१ प्रतिशतले बढेको हो । यता सेन्सेटिभ परिसूचक पनि ११.८१ अंकले बढेर ५४२.६३ विन्दुमा पुगेको छ ।

कूल २२९ वटा कम्पनीको १ करोड ८२ लाख ५४ हजार ४ सय २५ कित्ता सेयर खरिदबिक्री हुँदा ९ अर्ब ६७ करोड ६३ लाख १७ हजार ५९ रुपैयाँको कारोबार भएको नेप्सेले जनाएको छ ।

कारोबार भएका कूल १३ उपसमूहमध्ये आज सबै उपसमूहहरुको सेयर बढेको छ । आज सबैभन्दा धेरै उत्पादन र प्रसोधन समूहको सेयर बढेको छ ।

बजार बढ्दा कारोबार रकममा अरुण भ्याली हाइड्रोपावर लिमिटेड अब्बल देखिएको छ । आज हाइड्रोपावरको ३२ करोड ४६ लाख ५९ हजार ३१ रूपैयाँको कारोबार भएको छ ।

आइतबार स्ट्याण्डर्ड चार्टर्ड बैंक लिमिटेडको सेयर मूल्यमा सकारात्मक सर्किट लागेको छ । आज कम्पनीको सेयर मूल्य १० प्रतिशतले बढेर ५ सय ५० रुपैयाँमा अन्तिम कारोबार भएको छ ।

त्यस्तै, आज १०.२५ प्रतिशत ग्लोबल आइएमई बैंक लिमिटेड डिबेञ्चर २०८०/८१ को मूल्य सर्वाधिक घटेको छ । आज डिबेञ्चरको मूल्य ३.५९ प्रतिशतले घटेर ९ सय ९३ रुपैयाँमा अन्तिम कारोबार भएको छ ।