गैडा मारी खाग चोरी निकासी मुद्दाका फरार अभियुक्त तनहुँबाट पक्राउ

चितवन, २९ पुस । चितवन राष्ट्रि निकुञ्जले गैंडा मारी खास चोरी निकासी मुद्दाका अभियुक्तलाई पक्राउ गरेको छ । तनहुँ जिल्लाका शुक्लागण्डकी नगरपालिका वडा नं. २ कोत्रेबजारका कमल गुरुङलाई पक्राउ गरिएको हो ।

निकुञ्जका सूचना अधिकारी गणेशप्रसाद तिवारीका अनुसार नवलपुर जिल्ला अदालतमा २०७७ माघ २८ गते दायर मुद्दाका फरार अभियुक्त गुरुङ पक्राउ परेका हुन् । उनलाई तनहुँको आबुखैरहनी नगरपालिका वडा नं. १ सयसत्र फाँटमा लुकिछिपी बसेको अवस्थामा तनहुँ प्रहरीको सहयोगमा निकुञ्जको संयुक्त टोलीले पक्राउ गरेको हो ।

बि.सं. २०७७ भदौ २१ गते निकुञ्जको अमलटारी सेक्टर अन्तर्गत बाँदरझुला टापुको रातोघोल क्षेत्रमा खाग काटिएको अवस्थामा माउ र बच्चा गरी दुई वटा गैंडा मृत भेटिएका थिए । सोही घटनाको अनुसन्धानका क्रममा १३ जना प्रतिवादीको संलग्नता देखिएको तिवारीले जानकारी दिनुभयो । उक्त घटनाका १३ मध्ये हालसम्म ११ जना पक्राउ परेका छन् भने दुई जना अझै फरार रहेका छन् ।

चितवन राष्ट्रिय निकुञ्जको अनुरोधमा विगत एक वर्षअघिदेखि नै तनहुँ प्रहरीले गुरुङको खोजी कार्य जारी राखेको थियो । तनहुँ प्रहरी र सिबिआईको टोलीले समेत खोजी गर्दै आएका गुरुङलाई प्रहरीले पक्राउ गरी निकुञ्जको सुरक्षा टोलीलाई बुझाएको जनाईएको छ ।