युवाहरुसँग नवप्रवर्तनात्मक विचार माग

नवलपुर, २७ पुस । नवलपरासी (बर्दघाट–सुस्तापूर्व)मा जिल्लास्तरीय युवा नवप्रवर्तनात्मक विचार गोष्ठी हुने भएको छ । राष्ट्रिय युवा परिषद् नेपालको वार्षिक कार्यक्रमअनुसार जिल्लाको मध्यविन्दु नगरपालिकाले विचार गोष्ठी सञ्चालन गर्न लागेको हो ।

नगरपालिकाका शिक्षा, युवा तथा खेलकुद शाखाका उपसचिव टेकप्रसाद पाण्डेले जिल्लाकै आठवटा स्थानीय तहका युवाहरुसँग नवप्रवर्तनात्मक विचार माग गरिएको बताउनुभयो । “जिल्लामा रहेका १६ देखि ४० वर्ष उमेरसम्मका युवाको मनमा लागेका विचार स्थानीय तहको शिक्षा शाखामार्फत माग गरिएको छ,” पाण्डेले भन्नुभयो, “कृषि, स्वास्थ्य, शिक्षा, रोजगार लगायतका क्षेत्रलाई समेटेर युवाले आफ्नो विचार लेखेर पठाउन भनेका छौँ ।” जिल्लाभित्रका युवाहरुले माघ १० गतेभित्र स्थानीय तहको शिक्षा शाखामार्फत आफ्नो विचार पठाउनुपर्ने पाण्डेले बताउनुभयो ।

कुनै क्षेत्रको विकास तथा प्रवद्र्धन कसरी गर्न सकिन्छ भन्ने बारेमा युवाहरुले आफ्नो धारणा राख्ने प्रतियोगिता नै नवप्रवर्तनात्मक विचार गोष्ठी भएको उपसचिव पाण्डेले बताउनुभयो ।