चिसाप गीताश्री साहित्य पुरस्कार स्थापना

चितवन । चितवन साहित्य परिषद्का पूर्व अध्यक्ष श्रीभक्त अच्यूत वाग्ले र उहाँकी श्रीमती बागमती प्रदेश सभा सदस्य गीता वाग्लेले “चिसाप गीताश्री साहित्य पुरस्कार” स्थापना गर्नुभएको छ । उहाँहरुले पुरस्कारका लागि रु. ५ लाख २ हजार ४५ को चेक परिषद्लाई हस्तान्तरण गर्नुभएको हो ।

श्रीभक्तका अनुसार सो रकमले हरेक वर्षभरमा प्रकाशित उत्कृष्ट कृतिलाई रु.३५ हजार ४५ नगद सहित पुरस्कृत गरिने छ । परिषद् बि.सं. २०४५ सालमा स्थापना भएकाले पुरस्कार राशीको पछाडि अंक ४५ राखिएको उहाँले बताउनुभयो । श्रीभक्तकै संयोजकत्वमा परिषद्को आफ्नै भवन पनि निर्माण गरिएको छ ।

संविधानसभा सदस्य समेत रहनु भएकी गीता वाग्लेले साहित्यकारलाई थप उर्जा प्रदान गर्न पुरस्कारको राशी हस्तान्तरण गरिएको बताउनुभयो । उक्त रकम परिषद्का अध्यक्ष सुरेन्द्रप्रसाद अस्तफललाई हस्तान्तरण गरिएको हो । अस्तफलले देशभरबाट एक वर्षमा प्रकाशित भएका साहित्यिक पुस्तकहरुमध्ये उत्कृष्टलाई यो पुरस्कार प्रदान गरिने जानकारी दिनुभयो ।